Gereformeerde Skool Dirk Postma is ‘n onafhanklike skool in die hartjie van die Moot (Pretoria), wat deur ouers uit die plaaslike kerkgemeenskap gestig is. Die destydse droom om ‘n eie reformatoriese skool te begin waar leerlinge Bybelse onderrig en opvoeding deur roepingsgetroue onderwysers kon kry, het tot dade oorgegaan met 42 leerders en drie onderwysers wat die eerste klein tree getrou in 1986 gegee het.

Deur die jare het die Here telkens groei moontlik gemaak en ‘n kleuter- en hoërskool is by die laerskool gevoeg. Hiér word leerlinge uitstekend toegerus om God uit sy Woord en skepping te leer ken en roepingsgetrou hul toekoms tegemoet te gaan.

Vandag bars die skool uit sy nate, met net onder die 400 leerders en ongeveer 50 personeellede. Die huidige fasiliteite by die laer- en hoërskool moet dringend uitgebrei word en ook moet voorsiening vir groei in die komende jare gemaak word.